طريقة عمل مش الجبنة القديمة:😋😋

 

🌹 تعتبر الجبنة القديمة

أو المش ألذ أنواع الجبن ،حيث

تعد من الوجبات المفضلة.

🌹 طريقه عمل خميرة المش:

-في برطمان بلاستيك واسع

ومحكم الغلق.

-نجهز كيلو من اللبن(الحليب)

المغلي مسبقاً ونتركه في الأناء حتى يبرد،ثم نضيفه إلي البرطمان

-نضع عليه نصف كوب من الشطة

الناعمة.

-٣ملاعق كبيرة مليانة ملح.

-مورتة مش(يعني تجيبي شوية

مش من أي مكان فلاحي ويكون

مش نضيف جدا ومضمون لأنك

هتكملي بعد كدة عليةوطول ما

أنتي محافظة عليه هتلاقيه دائماً

روعه ويفتح الشهية).

-ملعقة كبيرة من الترمس البلدي

المر.

-قشر يوسفي وعلي قد ما تقدري

حطي ليعطي مذاق رائع جدا

وطعم قشر اليوسفي بيبقي

روعة بعد كده.

-ملعقة كبيرة من البابريكا.

-فلفل أحمر حار صحيح،ولما

تغسلية أوعي تحطية ولسه عليه

مياه

أستني لما ينشف كويس وبعدين

حطيه.

-وممكن تجيبي  كمية من شرش اللبن وتزودي بيه المش .

-ممكن تضيفي ملعقتين من العسل

الأسمر.

-عند تحضير المش يجب إحضار

مادة الدنكار ،من أي عطار،ثم

ضعيها في قطعة قماش قطنيه

وضعيها داخل برطمان المش علشان يحافظ عليه وميدودش.

-ضعي كل هذا المكونات وقلبيها

جيداً مع الحفاظ علي غلق البرطمان جيداً ،وألا يلمسه نقطة

ماء.

🥰طريقة تجهيز الجبنة:

ترش قطع الجبنة القريش بالملح والشطه

وتترك ليلة كاملة علي الأقل في مصفاه للتخلص

تماماً من الماء الزائد ،ولازم نتأكد

أنها بقيت خالية من المياة

حتي لا يتأثر المش ويحصل

عملية عفن له،وطبعا بنكون

مغطين المصفاه حتي الأنتهاء

من نزول الماء الزائد .

-لو عندك لبن رايب ومش محتجاه

حطي عليه ملح وقلبيه وزودي

المش.

-ضيفي الجبنة بعد ذلك إلي

البرطمان وأغلقيه جيداً وأتركيه

لمدة ثلاثة أشهر.

🌹وكل ماتاخدي منه لازم تكوني

حريصة مفيش مياه تيجي عليه

وأغلقي البرطمان جيداً.